L’é passaa trop svelt

Dal 1979 al Guido e ie am as é maridaa. Al prüm lü al lauräva da farair vi Samäda e inscìa am sé indac e stär in Engadina, cun ent al cor al gavüsc da tornär in Bargaia al pü prest pussibal par pudeir trär sü chilò i fanc ca’m fagèa quint da veir.

Da prümaveira dal 1980 al Batista Negrini l’é indac in pensiun e al Guido l’à ciapaa al se post. Am vegn sempar in ment quela seira incura ca poch dree lan undasc l’é rivaa al telefun cun la bela nutizia.
Al 1. da giügn l’era üna dumenga, ma, al 2, al Guido l’à scumanzaa e laurär cun al Luzi Petruzzi, l’Arno Clalüna e al Jokob Pool, ca l’era al guardabosch. Ognitant qualci veil dal pais i ingiävan e ura e giüdär sa ‘l laureri l’era tant.
In quel periodo i fagèan anca tant e man, ma al Guido l’era giuan e al laureri, specialment ent al bosch, ai plasgèa tant. Al vendardì dreemesdì l’ingiäva or la fogna (ca ‘l Kobli al clamäva Villa Stronzi) e fär al servizi da cuntrol e pulizia; e inscìa e la fin da la sadmana ie savèa parcié ca l’era da lavär la tuta!

Dal 1984 al cumün l’à töc al prüm tractor, ün Steyr ross e dal 1998 ün John Deer verd, e davent da là al Guido l’é sempar giü respunsabal dal mezzo. Al la droväva specialment ent al bosch par trär dree lan bora, ma er par fär altri laureri dree lan sträda o ent al pais.
D’invern cun al tractor cun sü al flugh i fagèan ora lan sträda. Par rivär da fär tüt, quel ca vèa al pichét, al vèa da partir la duman preist, par fär ora al prüm i parcheggi gion fond al pais e pö la sträda da Rutic, prüma che ca i rivassan i prüm laurant e evant ca l’ingéss ent al bus e tör ora i fanc da scola.

Cul temp i àn cambiaa diversi guardabosch e diversi aprendista. Pö i àn mess al quart laurant fiss. Da tüc al quintäva vargot da riar o nutizian alegra e interessanta.
Sa i laurävan dalonc, i tuleivan dree la marenda, insanò i gnivan güsgent e ciäsa e mangär al disnär el cald (d’invern) e “cun i pé sot la meisa e senza furmiga” (d’astäd).
I noss fanc i en crasciü e pö e zich e zich (incusa ca l’é giüst) i en indac par la si sträda.

Dal 2010 am à unii i cumün e inscìa la squädra l’as é insgrandida.
Ren, galun, spala, gianoil dal Guido i àn scumanzaa e fär sempar pü mäl. Er lan uperaziun l’en aumentäda da nümar e d’intensità.
Par furtüna l’en sempar indacia ben, ma laurär tüt al dì al scumanzäva e gnir trop pesant e inscìa am à panzaa da dasmetar intant ca üna certa mobilità l’é anca pussibla par godar cun gratitüdin, i dì ca ‘s restan.

E issa al Guido l’é quel ca ‘l Marcello Negrini al definisc ün VIP, ossia ün “Vecchio In Pensione”.

As restan tanci bii ragord e la cunstataziun ca: L’é passa trop svelt, ma l’é giü bel!



Renata Giovanoli-Semadeni